TAB-LEH

كلنا ليلى

2006-09-09T23:29:00.000+03:00

هه ......
أجدع سلاااااااااام
أنا حتكلم دلوقتي بصفتي فتاة مصرية عايشة في مجتمع مصري عربي و المفروض إسلامي
أنا مش بدَعي إن عندي خبرة عريضة بالحياة و لا إن عندي قدرة على فهم النفوس الإنسانية, و لكن من حياتي القصيرة و علاقاتي المحدودة طلعت بنتيجة واحدة بس....
(((((أنا مش عايزة أتجوز))))
للأسف من كل معارفي سواء أقارب أو أصدقاء وجدت ما يلي - أنا مش قصدي أعمم لكن للأسف ده اللي أنا شفته- الزوج يتزوج واحدة أهو بدل ما يجييب شغااالة: أهو واحدة تغسل له و تطبخ له و مفيش مانع تجيب عيااال و تربيهم بالمرة.
أنا سمعتهاحكمة من واحد زميل: الواحد يوم ما حيتجوز حيكون عشان لما يكبر يلاقي حد يديله كباية ماية مش أكتر!
أنا مقصدش أي نوع من الإهانة؛ بس حتى لو كانت البداية قصة حب مشتعلة فالنهاية واحدة.
و ده في رأيي بسبب الثقافة الشرقية المترسبة في الفكر العربي و اللي بتنص أن الرجل سي السيد؛ يعني عييب يدخل المطبخ, ميصحش ينشر الغسيييل ؛ ممكن يقعد مع ولاده بس للعب أو الخرووج-يعني في الأقات الظريفة- لكن التربية و الصح و الغلط ع الست، لأ و لو المولود الجديد عيط يبقى (ما تسكِتي الواااد ده أنا عايز أناام )بغض النظر عن صحة مراته و لا بقى لها كم يوم مانمتش و لا بتشتغل و لا وراها إيه
أنا بتكلم على مواقف محددة شوفتها و سمعتها؛ و من المواقف دي عايزة أسأل ليهههههههه:
-ليه لما بتبقى الست تعبانة و مش قادرة تقف على حيلها جوزها مش بيساعدها و بيعتبره دلع و لو قالتله طب و الغسييل أو الأكل، يبقى الرد و الناس تقوول عليي إيه؟في حين إنه لو حس بأقل تعب بتشيله و تدور له على أحسن دكاترة؟
-ليه لما الواحدة و جوزها بيتفرجوا ع المسلسل مع بعض-مثلاً- يحلاله يطلب كوباية الشاي؟ ميعرفش هو يقوم يعملها؟
-ليه لو العيال تعبوا و لا سقطوا في امتحان تبقى هي اللي غلطانة؟هو مش عليه نفس الواجبااات و الأعبااء؟
-ليه لما الست تهتم ببيتها و أولادها و تديهم حياتها يبقى من حقه إنه يتجوز عليهالإنها مش مهتمة به كما يجب؟
-ليه الراجل من حقه يخرج و يتفسح وقت ما يحب و هي محبوسة في البيت عشاان العييال؟

طب ليه ما يكنش :
-أول ما هي تحس بشوية تعب يساعدها أو حتى يعرض عليها و لو غسيل المواعين بس؟ أنا متأكدة إن في الحالة دي هي حترفض أي مساعدة و تيجي على نفسها عشاان تسعده
-يعرض هو عليها إنه يعملها معاه شاي؟ ساعتها حتجري عشان تعمله هي الأول
-ليه ما يشيلوش هم ولادهم في كل المراحل مع بعض؟ زي ما بتأكلهم هو يأكلهم، زي ما بتنيمهم هو ينيمهم، زي ما بتذاكرلهم هو يذاكرلهم.. ساعتها الولاد حيطلعوا مرتبطين بأبوهم زي ارتباطهم بأمهم
-ليه ما يساعدهاش في البيت و الأولاد عشاان هي تلاقي وقت تهتم بنفسها و به؟
-ليه ميخصصش و لو يوم واحد كل أسبوعين للزوجة تخرج بعيد عن دوشة الولاد و مهاام البيت الغير منتهية عشان تقدر ترجع تكمل رسالتها؟

ليه فاكرين إن شغل البيت ده شيء سهل و بسييط و مش من حق الست الشكوى من العبء اللي عليها؟
ليه دايما الرجالة حاسين إن المساعدة في شغل البيت ده نقص في رجولتهم؟ ده كان الرسول-ص- شخصياً بيساعد أهل منزله

أنا متأكدة إن فيه فالمجتمع سيدات متسلطات و سليطات اللسان و مبيعملووش حاجة في بيوتهم؛ زي برضو مانا متأكدة إن في رجالة بيساعدوا زوجاتهم قدر استطاعتهم؛ لكن زي ما قلت في البداية أنا بتكلم على النماذج اللي قابلتها في حياتي و أعتقد إنهم أغلبية

و في النهاية عايزة أقول إن الرجولة مش بالإمارة و تحكيم الرأي و لا بالعند و التذكير كل دقيقة و الثانية من وجوب طاعة الزوج و إلاااا...... و لا قولة كل شوية عليه اليمين بالتلاتة
و بصفتي ليلى أدعو كل ليلى غير متزوجة أن تفكر ميت مرة قبل الإقدام على هذه الخطوة اللي ممكن بسببها تفقد جزء كبير من شخصيتها واستقلالها بسبب تضحياتها المتواصلة عشان متخربش بيتها و ممكن بسببها تتوقف عن شغلها و قطع علاقتها بأصدقائها
دي مش دعوة للعنوسة لكن دعوة للتفكير بحكمة في كل عريس لليلى... يعني لازم إحنا -ليلى-نتأكد إنه حيرفق بينا و إننا مش حنضطر إننا نتنازل عن حقوقنا(تنازلات من جانب واحد بس يعني-جانبنا-) في سبيل الحفاظ على بيتنا و نتأكد إنه حيتخذ الرسول -ص- قدوة له

http://laila-eg.blogpspot.com

و اللهِ مش دعوة للحرب

2006-02-26T00:14:00.000+02:00

لما كنت صغيرة كنت ساكنة في بيت ع القنال, قديم, مبني ع الطراز الفرنساوي. و كانت حيطان البيت مليانة حفر نتيجة رصاص الحرب , و كان باين ع الشجرة آثار أسامي ناس كانت محفورة عليها من زمان و في تاريخ يرجع لسنة حاجة و سبعين. و كنت مؤمنة جدأً إن الأسامي دي لجنود أو متطوعين اتخذوا بيتنا مخيم ليهم أيام الحرب و إنهم من هنا حاربوا و عملوا اللي متعملش و كنت فخورة جداً ببيتناو كنت متأثرة جداً بالآثار دي لدرجة إني كان نفسي الحرب تقوم خصوصاً إن المعركة كانت حتبقى واضحة جداً من السطوح

و كبرت...... و بقيت افتكرني زمان و اضحك علية و على ساذجتي, و حسيت بامتنان فظيع بإن مهما كان في فساد في البلد, فالحمد لله علاقاتنا الخارجية مية مية و مفيش خوف من إن يوم أصحى على صوت طائرات العدو و لا فرقعة قنابل و لا في حظر تجول بليل و لا خايفة على حد من معارفي يروح الحرب و ما يرجعش... و الكلام دة كان لحد النهاردة

النهاردة خلصت رواية لإحسان عبد القدوس, وصف فيها حرب 56 و إحساس الناس أياميها و إزاي إنهم اجتمعوا كلهم على حلم واحد و أمل واحد, و من غير ما تبص في وش اللي جانبك عارف هو بيفكر في إيه, و إزاي إن معظم الشبان تطوعوا للمشاركة في الحرب و البنات في الهلال الأحمر و الناس كلها بتتسابق عشان تنفع بلدها, و الفلاحين و ستات البيوت اللي كانوا بيبعتوا أكل للجنود اللي في المناطق اللي حوليهم , دة غير أثر الأغاني الوطنية في نفوس الناس ساعتها اللي أكيد مختلف كل الاختلاف عن إحساسنا بيها دلوقتي

و طبعاً أنا ياما شفت الكلام دة في الأفلام بس أول مرة أحس بيه كدة

أنا مكنتش مبسوطة على قد ما بقيت غيرانة منهم, حسيت إن فاتتني تجربة شعورية (إن جاز التعبير) رائعة, أنا مش قصدي نروح نحارب, بس مستحيل حنحب بلدنا و نخاف عليها زي اللي سابقونا و حسوا فعلاً بقيمتها و حاربوا عشان يستردوها, إحنا خدناها كدة ع الجاهز

الحرب زي دواء منبه أو منشط يجمعنا تاني مع بعض, في الشعور و الأهداف و حرصنا عليهاأعتقد ساعتها النصب و السرقة حيقل أوي, مش عشان حدوث طفرة مفاجئة في الأخلاق و لا حاجة, بس لإننا حنحس فعلاً إن دي بلدنا , بتاعتنا, لينا فيها و قدمنا كتير ليها و حنخاف نبوظ اللي عملناه

2006-01-23T23:41:00.000+02:00

يا مرحباً

كنت قلت إني حرجع تاني للتدوين, بس الحقيقة مقدرتش لأن الصقيع اللي إحنا فيه و خصوصاً اليومين اللي فاتوعملي شلل فيي التفكير و في الصوابع لا أنا قادرة أفكر و لا قادرة أحرك صوابعي و كل قدرتي العقلية و العضلية كنت مسخراها لعمل كباية شاي بلبن سخنة و الجلوس تحت أطنان من البطاطين و الأصواف ...إلخ

بس حصلي رفرشمنت فظيع النهاردة بعد ما رحت معرض الكتاب مع أصدقائي الأعزاء و منهم طبعاً بلوو هانم

ملحظتش فرق في معرض السنة دي عن السنة اللي فاتت و لاحتى اللي قبليها غير بس إن بقى فيه مجلات كتير في سور الأزبكية -أنا شايفة كدة يعني- بس دة ما يمنعش إن إحنا اتبسطنا أوي و جبنا حاجات كتييير: رووايات و شعر و كم حاجة كدة تاريخية

مش عارفة ليه مجرد ما أروح معرض الكتاب بتبسط حتى لو مجبتش حاجة. يمكن عشان بشوف إن في ناس مهتمة فعلاً و بتقرأ أو يمكن مجرد منظر الكتب كدة بيرفع معنوياتي

ع العموم زيارة واحدة للمعرض غير كافية خالص و لازم مرة كمان ع الأقل

ربنا يعينا ...

2006-01-01T23:22:00.000+02:00

السلام عليكم............
أولاً كل سنة و أنتو طيبين عشان السنة الجديدة لعل و عسى تبقى أحسن من أختها اللي عدت إللهي ما يرجعها
بصراحة حاولت أعصر دماغي عشان أفتكر حاجة عِدلة تُذكر حصلت في 2005 بس محصلش نصيب
المهم... بقالي فترة معتزلة الفن و مهاجرة البلوجز و مش بزورها غير في أوقات متفرقة متباعدة للإطمئنان ع الحال العام فقط لا غير
سبب هذا الاعتزال كان الأول بسبب بداية الدراسة ثم بسبب وفاة جدتي و دخول رمضان و بعدين بقى عشان الامتحانات و المشاريع الغير المتناهية , كل دة جابلي إحباط و مبقتش لا قادرة أكتب ولا أقرأ أي حاجة
بس قلت مفيش مانع إن من وقت لآخر الواحد يشيل الصدأ اللي تكون على دماغه
و بما إن الصدأ لسة موجود ححل الأسئلة السبعاوية اللي لست أدري قالتلي عليها لحد ما أنشط المخيخ و أفكر في فكيرة أبدأ بها استعادة نشاطي البلوجوي

سبع حاجات نفسي أعملها

ألف العالم باليخت بتاعي
أشتغل ذواقة في مصنع شيكولاتة
ألعب مع العيال في المراجيح من غير ما حد يبوصلي باستغراب
أسافر أكمل دراستي في فرنسا
أشتري مكتبة الاسكندرية (او ع الأقل أعيش فيها كدة
أرجع المدرسة تاني
أنط بالبراشوت

سبع حاجات مش بعرف أعملها

أصرخ بصوت عالي
أركز في أغنية من أولها لآخرها(ما بالك المحاضرة بقى

أكتب شعر
ألعب استيمشين
أتزحلق ع الجليد
أشرب لبن سخن
أقتل صرصار

سبع حاجات بقولهم طول الوقت

لا يا شييييخة
شوف الدنيا
يا سلاااااام
بعد شوية
بس خلاص
معرفش بقى هو كدة
طب ليه(سابقاً

سبع أشخاص مغضوب عليهم

حالياً كل غضبي منصب على دكاترة المايكرويف معرفش إن كان ممكن يقدموا سبعاتهم و لا لأ

2005-09-09T22:49:00.000+03:00

الأسبوع اللي فات كان وشه حلو على ناس كتير أوي.... أعرف كتير اتجوزوا و خطبوا و العملية كانت متسهلة على الآخر, و كمان كان وشه حلو على فخامة الرئيس محمد حسني مبارك حيث إنه بعد منافاسات ضارية و انتخابات نزيهة فاز سيادته ع الحركرك بنسبة 88.571% فقط لا غير و كانت طبعاً نتيجة غير متوقعة و مفاجئة :D
بغض النظر عن شفافية الانتخابات أو تزويرها, اعتقد إن كان المفروض إننا كلنا نروح ندي صوتنا لأيٍ إن كان بدل النسبة الهزيلة اللي راحت لأن ده حق لينا و حتى يكون إثبات إننا إيجابيين و إننا قادرين ع المشاركة في الحياة السياسية و إننا مخيريين و مش مسيرين حتى لو مش صحيح فدي تعتبر خطوة و حتزود من احترامنا لنفسنا
ع العموم دي أكيد مش النهاية و المتوقًع إن الفترة القادمة حتشهد تغيرات كتير-أو ده ما أتمناه-كما إنه إدى وزن للأحزاب بعد ما بقت في خبر كان
سلااااااااام

2005-08-30T23:57:00.000+03:00

احم احم...... بقالي فترة مكتبتش حاجة و حاسة كأني أول مرة أكتب أي حاجة

من حوالي سنة ً و أنا بظبط خروجة للحسين, و أخيراً و بعد ما طلعت روحي روحت :) و دة تقريباً كان من أسبوعين بس
أنا مكنتش عايزة أروح هناك عشان أشتري حاجة أو أتفرج ع المحلات أو أطمن ع السياحة..أبداً
كل الموضوع إن وحشتني ريحة العطارة هناك
زي ما قلت قبل كدة إني قضيت فترة المدرسة في الاسماعيلية, و كنا بنيجي كل أسبوع (ويك إند) القاهرة عشان نقضيه مع العائلة الكريمة, و كان عندي علامتين معلمة بيهم وصولي للقاهرة:
أولها الزحمة الفظيعة, و دي ساعتها كانت حاجة بتبسطني أوي
تاني حاجة ريحة العطارة و إحنا معديين ع الحسين في طريقنا لبيت جدتي, و طبعاً من ساعة ما بدأوا حفر نفق الأزهر و إحنا ما بنهوبش ناحية الحسين خالص

المهم روحت و أستعدت الذي مضى و كله تمام, بس إتفاجئت من مناظر الشوارع هناك, يعني كنت أعرف عن المناطق السياحية دايماً بينضفوها و يوضبوها للسياح لكن لاقيت في كل مكان مخلافات المحلات و كانت حاجة تكسف
يعني مش مهم إن الشوارع مش ممهدة و متربة , بالعكس ده بيعلي الإحساس ب الماضي و عبق التاريخ
لكن الحاجات المرمية هنا و هناك مش منظر يعني

ع العموم أنا برضو اتبسط أوي و ريحة العطارة كانت مفحفحة و رجعت معايا البيت, و شماها حتى و أنا بكتب دلوقتي

سلااااام

2005-08-06T22:44:00.000+03:00

السلااااام لأهل البلوجز الكرام
بصوا يا إخوانا أنا بعد فترة ليست بقصيرة قابلت صديقتي و بعدين , و كعادتنا قررنا نزور إحدى المزارات السياحية في قاهرة المعز-يعني قولنا إحنا أولى من الغريب- و طرنا على برج الجزيرة و كلنا أمل إننا حنشوف منظر رائع من فووووق. مضحكش عليكم , أنا مرحتش هناك غير مرة وحيدة أيام الطفولة وكانت فرصة عظيمة إني أستعيد الذي مضى
المهم, رحنا وكنا مبسوطين أوي بنفسنا و وقفنا كدة بكل فخر أدام شباك التذاكر و سألنا:التذكرة بكم لو سمحتي؟ ردت عاملة الشباك:15 جنيه. قلنا:طب للمصريين؟. ردت: 15 جنيه. قلنا:طب للطلبة؟. قالت: 15 جنيه
رسمنا ابتسامة صفرة بلهاء على وشنا و شكرناها و تمنينلها يوم سعيد واختفينا
بصراحة استخسرت 15 جنيه في بصة يتيمة لا راحت ولا جت. و أنا اللي كنت فاكرة إن الدولة بتدعم و تشجع السياحة الداخلية

و بعد الخروجة التحفة دي و المشوَرة رايح جاي في عز الشمس, قعدت أفكر, يعني لو رجل ذو دخل متوسط نفسه يفسح أسرته ميقدرش يخدهم مكان زي ده, مش معقول يدفع لكل فرد في أسرته 15 جنيه, يعني لو أسرة مكونة من 5 أفراد يدفع سيادته 75 جنيه و كل ده عشان يبوصوا بس أمال لو أكلوا حيدفع كم

هي دي يا جدعان مش بلدنا وإحنا أولى بيها و لا إيه؟ المفروض تكون المزارات دي حق مكفول لكل مواطن

2005-07-30T18:34:00.000+03:00

دلوقتي بعد ما تأكدت و شفت بعيني أقدر أقول إني

نجحت

و طبعاً لازم ألفت نظركم إني لا كنت قلاقانة و لا حاجة و لا كان دمي نشف و لا كنت خلاص حطأ و لا أي حاجة خالص و النتيجة طلعت بدري جداً و الحياة حلوة و بمبي بمبي

و طبعاً تقديراً لمشاركتكم الوجدانية لي قررت إني أعمٌلكو عزومة بلوجية يعني كل اللي حيشرف البلوج يتخيل نفسه بيشرب حاجة ساقعة و لاأقولكم كل واحد يشرب اللي هو عايزه و لو عايزين تورتة و جاتوه برضو مفيش مانع.......... ده بلوج كرم

و ابتداءاً من هذه اللحظة حبدأ في استعادة نشاطي البلوجوي

سلاااااااام

2005-07-20T23:26:00.000+03:00

أعتذر عن عدم كتابة أي بوست هذه الفترة لإني في حالة هدنة مع النفس لحين ظهور النتيجة

و نسألكم الدعاء

2005-07-13T00:58:00.000+03:00

حاجة تخنق بجد لما تبقى قاعد في بيتك لا بيك و لا عليك و تلاقي الناس في الشارع قاعدة تتخانق و مش بس مرة واحدة في اليوم, لا... دي جرعة مكثفة طول اليوم. و الموضوع بقى ممل أوي و غير ممتع لإن سيناريو الخناقة هو هو كل مرة، و يا ريت على حاجة تستاهل
المشهد المعتاد
المكان: شارع بيت جدتي.......... و هو شارع ضيق و محندأ لا يتسع لمرور أكتر من عربية واحدة غير العربيات الراكنة على الصفين
الزمان: أي ساعة في ال 24 ساعة
الأحداث: يبدأ المشهد بدخول عربيتين في وش بعض, و قبل أي حاجة ترتفع صوت الكلاكسات معلنة عن حرب قادمة, و بعدين تبدأ الأيمانات و الحلفان بالطلاق بتلاتة و ارجع ... لأ ارجع إنت و بعدين سلسلة عذبة من الشتايم المتلاحقة و فجأة ............... لحظة هدوء و العربيتين يختفوا
و ساعات بيكونوا أكترمن عربيتين, يعني ممكن تلاقي عربية واحدة و في وشها 10 تانيين عايزين يعدوا بس عِند و جَبَِروت لازم ال10 هما اللي يرجعوا عشان سيادتها تعدي

اللي أنا عايزة أفهمه بقى هو ليه الفيلم ده كله؟ يعني هل الموضوع فعلاً يستحق و لا ده ناتج من سوء تنظيم المرور و لا مجرد عِند و لا الناس مبقتش طايقة بعضها و لا حتى طايقة نفسها و لا ايه الحكاية؟
و هل دي ملاحظة فردية ولا ده موجود في مصر كلهاو لا دي سياسة متبَعة في العالم كله ؟
أتمنى إنها متكنش ظاهرة منتشرة أوي لإن لو إحنا خلاص وصلنا للمرحلة دي يبقى يا ترى اللي جاي ايه؟

2005-07-09T20:17:00.000+03:00

بعد حوالي شهر من التحاقي بمدرسة البلوجاوية, و هو طبعاً شهر مش كتير بس أنا قلت إني لازم أقولكم عن انطباعي عن هذا المجتمع البلوجوي. بصراحة خلال الشهر ده أنا رأيي اتغير ميت مرة. يعني مثلاً في الأول خالص كنت مبسوطة جداً لإني أخيراً لاقيت مكان أقدر أتنفس فيه بحرية من غير عيب وميصحش، يعني حتة أطلع فيها كا اللي جوايا قبل ما أطأ. ثم جت مرحلة الاحباط لإني اكتشفت إن الناس كلها أو على الأقل الأغلبية عندهم موهبة الكتابة و أنا يا عيني عليا مش بعرف أقول كلمتين عدلين على بعض، بس أنا قلت و لا يهمني أهو برضو الواحد يتعلم ازاي يعبر عن نفسه. و بعدين دخلت مرحلة ادمان البلوجز و أنا كنت لسة مخلصتش امتحاناتي و أمي لاحظت و كلما سنحت الفرصة كانت بتديني كلمتين في جنابي، بس الحق يقال أمي طبعاً كان عندها حق ما هو ماكانش وقت إدمان أي حاجة من أي نوع، و بدأت كعادتي أعاتب نفسي و أقولي و أنا كان مالي و مال الحاجات دي ما أنا كنت قاعدة في حالي كافية خيري شري, كاتمة في قلبي و ساكتة لكن أقول إيه ما هي الست لست أدري هانم هي السبب أعدت تزن تزن عشان انضم للبلوجاوية لحد ما في لحظة ضعف طاوعتها و سمعت كلامها و على رأيها الزن على الودان أمر من السحر
المهم يعني بعد فترة كانت مرحلة العتاب دي عدت و راحت لحالها و لاقتني رجعت لحالة الانبساط لإني اكتشفت أد إيه أنا محظوظة لكوني بقيت جزء من هذا المجتمع الرائع. في الشهر ده بس قابلت ناس كتير أوي أكتر من اللي قابلتهم السنة اللي فاتت كلها، و مش قابلتهم بس ده أنا عرفتهم و صدقتهم من غير ما أشوفهم يعني من غير أي براويز من برة ، و أنا طبعاً عارفة إن في كتير مننا شخصيته اللي بيكتب بيها مختلفة عن اللي معروفة عنه في حياته اليومية لكن أنا متأكدة إني اللي عرفتها و اتشرفت بها هي الأقرب للحقيقة, والحمد لله كلها شخصيات تشرف، أصل بصراحة أنا كنت خلاص اقتنعت و آمنت إن الشباب المثقف صاحب الرأي و الفكر الحر موضة قديمة انقرضت من زمان, و اطمنت أكتر بعد حملة مش كدة الشرسة بقيادة غادة لأني أعجبت فعلاً برد الفعل و عدم الاكتفاء بالنقد لكن بالطريقة الإيجابية اللي الكل حاول يشارك فيها لتصحيح صورة مصر
أنا بس حبيت أديكم فكرة عن رأيي قبل فاتورة التليفون ما تيجي و أعرب عن سعادتي بهذه الحياة الجديدة
سلاااااااام

مقتطفات اسمعلاوية

2005-07-02T14:18:00.000+03:00

بما إني لسة راجعة من الاسماعيلية و لازالت الأفكار الاسمعلاوية مسيطرة على تفكيري و الشحنة عالية اليومين دول و طبعاً لازم أفرغها, قررت اكتب تاني عن مدينتي, المرة دي مش عن الاسماعيلية نفسها و لكن عن الاسمعلاوية و يا ريت لو كل واحد يكتب عن مدينته و نشوف مدى الاختلاف و التقارب بينهم. و دي بعض العادات اللي أعتقد إنها خاصة بالاسماعيلية أو بمدن القناة بوجه عام:

أولاً بالنسبة لشم النسيم، فبجانب الفسيخ و الرنجة و البيض الملون فهناك طقس آخر مقدس و هو حرق أللنبي. و أللنبي هو قائد القوات البريطانية في مصر و فلسطين 1918-1917 و كان ظالم و مستبد و للانتقام منه و من الاحتلال الانجليزي يقوم كل بيت اسمعلاوي (ما عدا بيتنا) بعمل عروسة له و حرقها ليلة شم النسيم. و بسبب المشاكل الناتجة عن هذه الحرائق خصصت المحافظة ساحة واسعة يتم فيها حرق عروسة ضخمة و يتجمع الاسمعلاوية للمشاهدة و الاحتفال

ثانياً من الأكلات الشهيرة في الاسماعيلية الملوخية بالجمبري و يا ريت محدش يسألني عن المقادير و طريقة العمل و لا حتى عن طعمها لإني عمري ماجربتها و لا حتى عندي النية

ثالثاً المانجة الاسمعلاوي، و طبعاً دى من الفواكه اللي معروفة بها الاسماعيلية، و طوال موسم الصيف تلاقي الا سماعيلية غرقانة فيها. و اللي راح هناك حيلاقي شجر المانجة في كل حتة، في الحقول والجناين و البيوت (ذات الحدائق طبعاً) حتى مدرستنا كان فيها شجر مانجة. و بما إن عيلتنا كلها مدمنة مانجة فتقدروا تقولو إن انتقالنا للقاهرة كان جزء من العلاج

و أخيراً النادي الاسماعيلي، و هو طبعاً غني عن التعريف فمش حتكلم عنه لكن حتكلم عن جماهيره. أعتقد إن العلاقة بين الاسماعيلي و جماهيره خاصة جداً فهما وراه على طول الخط و لا الاحتفلات الصاخبة اللي بيعملوها في حالة انتصاره و حالة الاكتئاب العام اللي بتصيب الاسمعلاوية في حالة خسارته. وفي وقت مبارايات الاسماعيلي بيكون في حالة من الشلل في الشوارع لحين انتهائها

كفاية عليكم الجرعة الاسمعلاوية دي و سلاااام

بيب...بيب...دراويش

2005-06-23T14:25:00.000+03:00

يا سلاااام.... أنا مبسوطة فعلاً لإني حتكلم عن مكان بحبه جداً و قضيت فيه معظم حياتي

الاسماعيلية

أنا اتولدت هناك وعشت هناك أيام المدرسة حتى المرحلة الثانوية ثم شديت الرحال على القاهرة للالتحاق بكليتي المبجلة

المهم إنها من أكثر المناطق نظافة و هدوء و خضرة و رقي شفتها في حياتي، حتى أسلوب الحياة هناك مختلف: فهو أسهل و أهدأ و العلاقات و الروابط الانسانية أقوى

و كما هو معروف، تأسست مدينة الاسماعيلية عام 1863 أثناء حفر قناة السويس، وسميت نسبة للخديوي أسماعيل و تقع على بحيرة التمساح

أنا مش عايزة ألقي محاضرة في التاريخ ولا في الجغرافية أنا بس عايزة أعبر عن حبي و احترامي للمكان ده، و أيضاً دي دعوة للي مرحش هناك قبل كدة أنه يتعرف على مكان جديد و جميل في بلده و فعلاً حيحس إنه في مدينة أوربية

رجاء: لو في حد ناوي يروح الاسماعيلية يا ريت بلا ش رحلات الكلية العجيبة دي يعني يا ريت يروح مع حد يعرف الاسماعيلية كويس و يفرجه على الأماكن اللي هناك اللي فعلاً تستاهل أحسن الكليات بتودي أماكن غريبة لا تدل على البلد

سؤال بسيط

2005-06-21T07:21:00.000+03:00

ايه الحكمة في إن دايماً الأخبار المصرية مختلفة عن بقية الأخبار في العالم كله؟ هل دة لإننا ماشيين على مبدأ خالف تُعرَف و لا لإن هي دي سمة التميز؟!

لأ بجد ايه الحكمة؟ تلاقي الدنيا كلها بتتكلم في وادي و احنا عندنا الدنيا بمبي بمبي و ليس في الامكان أحسن مما كان

ما هم أكيد سمعوا عن الاختراع اللي اسمه الدش اللي دخل بيوت مصرية كتير؛ يعني الأخبار الحقيقية حتوصلنا سواء رضوا أم أبوا. و لا ده عشان يخلقوا عندنا نوع من التشكك و التذبذب في الأراء و عدم الثقة في أي حد و في أي كلام؟

ولا بلاش سوء الظن, هي دي أكيد الأخبار اللي وصلتهم وهما رددوها زي ما هي من غير لا تحريف و لا تغيير و لا حتى أي عمليات تجميل

سَمَع هُسسسسسسسسسسسسس

2005-06-15T12:03:00.000+03:00

و أخيراً و بعد معارك دامية دامت كما لو كانت دامت دهراً كاملاً

أخدنا الأجازة

بغض النظر عن النهاية إن كانت سعيدة أم أليمة، فهي لم تكن معارك متكافئة بالمرة لكن مش مهم, المهم إني أخدت الأجازة. لكن بدأ صراع آخر داخلي و هو حعمل أيه في الأ جازة؟ المشكلة مش إني مش لاقية حاجة اعملها، بالعكس ده من كتر الحاجات اللي أنا عايزة أعملها شكلي مش حعمل حاجة خالص. على العموم يؤجل التفكير في هذا الموضوع لحين الانتهاء من فترة النقاهة

الحقيقة بقى أنا مش جاية أتكلم عن الأجازة , أنا عايزة أشكر ناس كانوا واقفين جانبي طول الفترة اللي فاتت. معتقدتش إني شكرتهم قبل كدة وجهاً لوجه، مش عارفة ليه, يمكن لإني مش بعرف أعبر عن نفسي كويس. المهم إني لاقيت إن دي الطريقة اللي حعرف أشكرهم بيها حتى لو محدش منهم حيشوف اللي حكتبه

أولاً أهلي(و إخواتي طبعا)، و هما كانوا واقفين جانبى طول حياتي مش الفترة اللي فاتت بس,و الحقيقة مش عارفة أقول أيه لإني مهما قلت مش حيجي حاجة جنب اللي المفروض يتقال. ربنا يخليهم لي

ثانياً أصحابي في الكلية, أنا مش عارفة هما إزاي قدروا يستحملوني سنة كاملة, كل يوم أروح لهم بمود مختلف. يوم عندي إكتئاب و إحباط فظيع, و يوم عندي لامبلاة و تناحة غير عادية, و يوم دماغي عالية وبقول كلام مالوش علاقة ببعضه. معلش ربنا يصبرهم

و أخيراً, أحب أشكرني أنا ......ما هو برضه الأقربون أولى بالمعرف

2005-06-11T16:59:00.000+03:00

مؤاخرا لاحظت فرق فظيع بين الأطفال اليومين دول و الأطفال لما إحنا كنا أطفال, حقيقي اتخضيت من الفرق , حاسسوني إن أنا جاية من العصور الغابرة , يعني مثلا خدوا عندكم:

كنا و إحنا صغيرين بنحب الحواديت, عادي يعني, الأطفال بيحبوا الحواديت. كانوا يقولو لنا حكاية الفيل أبو زلومة نضحك و نقلده, يقولولنا علي بابا نفرح لما يتغني, يقولولنا على سنووايت نقعد نحلم معاها لحد ما الأمير يجي ينقذها. لكن دلوقتي تقول للطفل من دول الفيل أبو زلومة يضحك و يقولك هو يعني كان في فيل من غير زلومة؟ تيجي تجيبلو سيرة علي بابا يقولك دة حرامي و زي الأربعين حرامي, تحود على سنووايت و تقول كان يا ما كان في بنت حلوة وجميلة.......قبل ما تخلص الجملة تلاقيه طلع فيك يعني لو كانت وحشة مينفعش,دي خلقة ربنا. تحاول تصلح موقفك و تقول أصل أنا كان قصدي ......لكن مين بقى حيسمعك

خلاص مش مشكلة, خلينا في الأغاني -ما أكثر أغاني الأطفال:ابريق الشاي و ماما زمانها جاية وأغاني تانية كتير- تيجي بقى تقول للطفل دلوقتي غنيلي أغنية, يروح يغنيلك أغاني نانسي عجرم تحاول تفهمه إنك قصدك نوع تاني من الأغاني يقوم يغنيلك حاجة لروبي

طب بلاش كل اللي فات، شوف الفرحة اللي في عيونهم لما حد يديهوم فلوس و خيبة الأمل لما يخدوا لعبة

بس برضه الحق يقال، أنا لاقيت تشابه بينا و بينهم، وتشابه مش بسيط ، يعني أنا افتكر و أنا ماما بتوديني الحضانة كنت أقعد أعيط عشان عايزة أروح معاها, دلوقتي برضه الأطفال بيعيطوا في الحضانة بس وقت المرواح عشان عايزين يقعدوا يلعبوا و ميروحوش مع أهاليهم

أقول أيه بس ما هما دول جيل الدش و الانترنت، يعني عيال طالعة واعية و مفتحة من يومها. و أكيد هو دة التطور الطبيعي للطفولة.

بس السؤال الملح و اللي بيفرض نفسه بقوة على الساحة هو هل يجوز استخدام مصطلح -براءة الأطفال- أم بطل و راحت عليه؟؟

أنا لا أكذب و لكني أتجمل

2005-06-08T14:27:00.000+03:00

أكيد في كتير منكم سمعوا الموضوع بتاع (ماما سوزان) لما استقبلت(طنط لورا بوش) في الاسكندرية , و راحت تفرجها التطوير اللي قامت به الدولة بفضل المعونة اللي الأمريكان(الوحشين) ادوهلنا و كانت تقدر بحوالي 30 مليون دولار (بسسس) و طبعا المبلغ شوية و مقدرناش نعمل به حاجة , و طبعا (ماما سوزان)- فيها الخير- محبتش تكسف (طنط لورا) فجابت مدرسة جاهزة بالطلبة و المدرسين و الادارة حتى يكونوا صورة مشرفة لمصر. و بصراحة بقى أنا مش فاهمة الناس مضايقين من الموضوع ده ليه؟ أنا بالنسبة لي اتعلمت إني أعمل اللي أنا عايزاه و بعدين بقى ربنا يسهل و على رأي المثل كل مشكلة و لها حل.

2005-06-07T14:10:00.000+03:00

ترددت كثيرا قبل إنشاء هذا البلوج الحقيقة لا أعرف ما سبب هذا التردد.هل معنديش حاجة أقولها؟ و لا يمكن خايفة إن لغتي العربية تفضحني؟؟؟؟ و بعد نظرة فاحصة للموضوع , لقيت جوايا كلام كتييير أ وي عايزة أطلعه.
إذا المشكلة في اللغة, و بصراحة لقيت إنها حاجة تكسف أوي أما تكون لغتي هي مشكلتي , ميصحش يعني.
فقررت أكتب على أمل إن مستوايا اللغوي يتحسن مع الوقت.
أما بالنسبة لاسم البلوج ( طب ليه) فكان من أحد لوازمي أيام الطفولة , وبعد ما تخلصت من هذه الزمة رجعت ندمت لإنها كانت السبب في فهم حاجات كتير عن طريق سؤال بسيط بطلت أسأله من زمان.
و دلوقتي بقى أعرفكم على نفسي: أنا طالبة مطحونة في كلية الهندسة أحاول جاهدة الخروج من السنة دي بسلااااااااااااام
و شكرا